Mahigpit na itinanggi ni Emmanuel Plaza, chairman-paralegal services ng Divisoria Public Market Credit Cooperative, ang mga naging akusasyon ni Vice Mayor Honey Lacuna-Pangan laban sa kanya.
Giit ni Plaza, walang kinalaman ang dating mga mayor ng Maynila sa bentahan ng Divisoria market partikular na si ex-Mayor Mel Lopez na ama ng kasalukuyang tumatakbong alkalde ng Maynila na si Atty. Alex Lopez.
Aniya, malinaw na nakalagay sa Deeds of Absolute Sale, na sa pagitan nina Mayor Francisco “Isko Moreno” Domagoso at George Chua, chairman ng Festina Holdings Corporation na October 16, 2020 ang naging petsa ng bentahan nito.
Ayon kay Plaza, wala ring katotohanan na hindi na pinamamahalaan ng City of Manila ang palengke dahil simula noong 1992 hangang October 2021 mayroon itong market master na siyang representante ng city hall upang mamahala doon at mangolekta ng mga fees.
Katunayan, ang huling nakatalagang market master sa Divi mall ay si supervisor Alexander Villanueva na umalis noong October 2021 sa palengke. Mayroon din sila mga pinanghahawakang mga resibo na kanilang pinagbabayaran dito.
Hindi aniya naging advantageous sa lungsod ang pagbebenta ng palengke dahil, ayon sa Deeds of Absolute Sale, pinagbili ang palengke sa halagang P13,000.00/ square meter.
Napag-alaman na ang mga may-ari ng tindahan ay nagbabayad ng P8,000.00 sa municipal licence at P50/day o 1500/months o P18,000.00 per year.
Ang kabuuan aniyang ibinabayad ng mga manininda bawat tindahan ay umaabot ng P26,000.00 bawat taon sa city hall.
Ang sukat ng bawat tindahan ay mayroon 2.25 square meters. Ang ibig sabihin, naibenta ang bawat tindahan sa halagang P29,500.00 pesos lamang.
Sinabi pa ni Plaza na ang P26,000.00 na collection ng city hall sa mga manininda taun-taon, pinagpalit sa halagang P29.500.00 na bentahan ng bawat puwesto.
Ayon pa kay Plaza, wala rin katotohanan na dumaan sa tamang proseso ang bentahan sa Divisoria Market, dahil hindi nagkaroon ng public hearing at hindi rin kinonsulta ang mga vendors ukol dito.
Higit na nagtataka ang mga vendors ng Divisoria Market nang malaman nilang dalawa lamang ang pumasok sa bidding at ito ay ang KMC Realty Corp. at Festina Holdings, Inc., kung saan ang Festina ang pinaboran sa nasabing tawaran.
Nagkabayaran sa city hall noong October 16, 2020 at nalaman lamang ng mga vendors 25 days nang naibenta ang palengke noon November 11, 2020.
