Naglabas na ng temporary restraining order (TRO) ang korte upang pigilan ang Sugar Regulatory Administration sa pag-aangkat ng 200,000 metric tons ng asukal simula Marso.
Natanggap na ng SRA sa Quezon City ang kopya ng TRO mula sa Sagay City Regional Trial Court Branch 73 ng Negros Occidental.
Ayon kay RTC Branch 73 Executive Judge Reginald Fuentebella, 20 araw epektibo ang TRO habang isasagawa ang Writ of Preliminary Injunction sa Pebrero a–24 sa pamamagitan ng video conference.
Una nang hiniling ni Rural Sugar Planter’s Association Incorporated (RSPAI) President Joseph Edgar “GJ” Sarrosa sa korte na ipatigil ang planong importasyon ng asukal.
Ang RSPAI ay miyembro ng Association of the United Sugar Producers Federation (UniFed) kung saan director si Sarrosa.
Iginiit ni Sarrosa na ang SRA Sugar Order 3 ni Adminstrator Hermenegildo Serafica na nagpapahintulot sa pag-aangkat sa importasyon ng asukal ay magdadala ng matinding pinsala sa sugar industry na hinagupit ng bagyong Odette.
Wala anyang batayan ang naturang kautusan dahil inamin mismo ni Serafica na walang rason upang magtaas ng presyo lalo’t stable ang supply ng asukal sa kabila ng epekto ng bagyo.
Ang Negros Occidental ang top-sugarcane producing province, kung saan 60% ng supply ng asukal ng bansa ay nagmumula sa nasabing lalawigan.
