Daragdagan na ng gobyerno ang mga hotel na gagamitin bilang isolation facility makaraang umakyat na ang COVID-19 utilization rate ng temporary treatment and monitoring facilities o TTMF sa halos 78%.
Kinumpirma ni Health Undersecretary at Treatment Czar Leopoldo Vega na tumaas ang bilang ng requests para sa isolation o quarantine facilities sa gitna ng patuloy na paglobo ng COVID-19 cases sa bansa.
Ayon kay Vega, nasa 10 hanggang 15% lamang ng mga temporary treatment facility ang nagamit noong Disyembre pero bigla itong sumipa pagsapit ng Enero.
Ilan sa mga hotel at pasilidad ay nagtapos na ang kontrata bilang TTMF. Noong December 31, 2021 kaya’t i-re-reactivate na rin ang iba pang temporary treatment facility ng mga local government unit.
Kahapon ay nakapagtala ang DOH ng panibagong all-time high na 34,021 additional COVID-19 cases kaya’t lumobo na sa 237,387 ang aktibong kaso.
