Inireklamo ni Defense Secretary Delfin Lorenzana kay Chinese Ambassador Huang Xilian ang panibagong insidente nang pang-ha-harass ng Chinese Coast Guard matapos ang matagumpay na re-supply mission ng supply boat ng Pilipinas sa Ayungin Shoal.
Ayon kay Lorenzana, hindi na hinarang ng Chinese Coast Guard ang mga supply boat ng Pilipinas katulad nang ginawang pambobomba ng water canon nito noong Nobyembre 16.
Ngunit ayon pa sa Kalihim, mayroong Chinese Coast Guard Vessel na umaaligid sa lugar at nagpadala ng tatlong tauhan lulan ng rubber boat upang kuhanan ng litrato at video ang pagbababa ng mga suplay sa BRP Sierra Madre. Na itinuturing aniya bilang isang paraan ng pananakot at pangha-harass.—sa panulat ni Joana Luna