Nanindigan ang Philippine National Police na hindi na maaaring magsilbing detention facility para sa mga high-profile na personalidad ang custodial facility sa Kampo Crame sa Quezon City.
Ayon kay PNP Chief General Jose Melencio Nartatez Jr., kanya nang inatasan ang Legal Service ng PNP na ipaalam at ipaliwanag sa Sandiganbayan kung bakit hindi na kayang tumanggap ng mga personalidad na sumasailalim sa paglilitis ang kanilang custodial center.
Ginawa ni Gen. Nartatez ang pahayag bilang tugon sa kahilingan ni Senador Jinggoy Estrada na ilipat ang kanyang detensyon sa pasilidad ng PNP.
Matatandaang dati nang inanunsyo ng PNP na may mga planong isailalim sa rehabilitasyon ang PNP custodial center upang bigyang-daan ang pagtatayo ng mga bagong opisina.—sa panulat ni Anjo Riñon
