Nananatiling kontrolado ng Philippine National Police o PNP ang sitwasyon sa Mindanao kaagapay ang Armed Forces of the Philippines o AFP.
Ito ang pagtitiyak ni PNP Chief P/Gen. Guillermo Eleazar sa gitna na rin ng nangyayaring kaguluhan sa Afghanistan makaraang makabalik sa poder ang mabalasik na puwersa ng mga Taliban.
Una rito, nagpahayag ng pangamba si Philippine Institute for Peace, Violence and Terrorism Research C hief Rommel Banlaoi na posibleng umabot sa Mindanao ang nangyayaring tensyon sa naturang bansa dahil sa pakikisimpatiya rito ng mga lokal na terrorista.
Pero pagtitiyak ng PNP Chief, hindi nila hahayaang sabayan ng mga lokal na terroista ang gulo sa nasabing bansa lalo’t hindi tumitigil ang mga puwersa ng gobyerno na tugisin ang mga ito.
Sa huli, hinikayat ng PNP Chief ang publiko na manatiling laging naka-alerto at mapagmatyag at huwag mag-atubiling isumbong sa mga awtoridad ang kahina-hinalang mga pagkilos na maglalagay sa seguridad ng mga komunidad sa alanganin.—ulat mula kay Jaymark Dagala (Patrol 9)
