Naglunsad ng malawakang pagpaparehistro ang Philippine Statistics Authority (PSA) sa General Headquarters ng Armed Forces of the Philippines (AFP) ngayong araw.
Ito’y para i-rehistro ang lahat ng mga sundalo ng hukbong sandatahan gayundin ang mga opisyal at mga kawani ng Tanggulang Pambansa para sa National ID sa ilalim ng Phlippine Identification Sytem (PhilSys).
Pinangunahan ni Defense Secretary Delfin Lorenzana ang pagpaparehistro na sinundan ng mga opisyal at kawani ng attached bureaus nito kabilang si NDRRMC Executive Dir. Ricardo Jalad.
Ayon kay AFP Vice Chief of Staff Lt/Gen. Erickson Gloria, target na mairehistro ang 15,000 mga tauhan ng AFP at Defense Department na nag-oopisina sa Kampo Aguinaldo.
Binigyang-diin pa ng Opisyal na mahalaga ang marehistro sa PhilSys dahil maliban sa magsisilbing legal document sa lahat ng transaksyon sa gobyerno, makatutulong din ito para matukoy kung sinu-sino ang mga terorista’t kriminal na gumagamit sa huwad na pagkakakilanlan
Dahil dito, hinikayat ni General Gloria ang mga Sundalo na samantalahin na ang pagkakataon hanggang Agosto 10 para makapagparehistro at makakuha ng National ID. —ulat mula kay Jaymark Dagala (Patrol 9)