Pinakikilos na ng pamunuan ng Philippine National Police (PNP) ang Criminal Investigation and Detection Group (CIDG) para tugisin ang mga iligal na nagbebenta ng COVID-19 vaccine sa bansa.
Ito’y ayon kay PNP Chief P/Gen. Guillermo Eleazar matapos makalaboso ng mga operatiba ng National Bureau of Investigation (NBI) ang isang Chinese national, nurse at medical tehcnologist na nagtangkang magbenta ng bakunang Sinovac.
Ayon kay Eleazar, inatasan niya ang CIDG na makipag ugnayan sa mga lokal na pulisya para mabilis matunton ang mga pinagmumulan ng mga ipinupuslit na bakuna.
Nabatid na hindi pa inaprubahan ng Food and Drugs Administration (FDA) ng Pilipinas ang commercial sale o pamamahagi ng kahit anong bakuna sa lokal na merkado.
Kung ituturok ang mga ito, sinabi ng PNP Chief na tiyak na maituturing na iyong peke lalo’t kung nakapasok ito sa bansa sa pamamagitan ng pagpupuslit.