Tinatayang mahigit P200,000 halaga ng hinihinalang shabu ang narekober habang sugatan naman ang isang drug suspect matapos mauwi sa bakbakan ang ikinasang buy-bust operation sa Purok 1, Brgy. Mataas na Lupa, Lipa City.
Kinilala ang suspek na si Neil Vivencio Katigbak, 39 taong gulang, driver, at residente ng Brgy. Namuco, Rosario, Batangas.
Ayon sa Lipa City Police Station at Regional Drug Enforcement Unit (RDEU), nakahalata si Katigbak na pulis ang kanyang katransaksiyon hanggang sa bumunot ito ng baril at nagpaputok.
Agad na tinamaan ang suspek nang mapilitang gumanti ang mga pulis at kasalukuyan itong nilalapatan ng lunas sa Mary Mediatrix Medical Center.
Maliban sa buy-bust money na isang libong piso, narekober din sa pinangyarihan ng insidente ang isang magnum revolver, isang kotse, at mahigit dalawang daang libong pisong halaga ng umano’y shabu.
