Pinaalalahanan ng Department of Interior and Local Government (DILG) ang mga Local Government Units (LGUs) na huwag kalimutang makipag-ugnayan sa National Task Force Against COVID-19 at Department Of Health (DOH).
Kaugnay ito sa kanilang plano na bumili ng bakuna kontra COVID-19 para sa kanilang mga nasasakupan.
Ayon kay DILG Secretary Eduardo Año, kanilang pinasasalamatan ang mga LGUs sa kanilang hakbang na tulungan ang pagsisikap ng national government na mabakunahan ang lahat ng mga Pilipino.
Aniya, nakatakda na silang bumili ng nasa 184 milyong dose ng bakuna mula sa ilang mga manufacturers at malaking tulong ang pagsisikap ng mga LGUs na makahanap din ng bakuna para mabakunahan ang mas maraming tao.
Gayunman, sinabi ni Año na kinakailangan ang pakikipag-unayan ng LGUs sa national government sa pamamagitan ng isang tripartite agreement kasama ang mga lokalidad at mga pharmaceutical companies.
Iginiit ni año na dapat sundin ang sistema para matiyak na nasa iisang pahina na ang lahat ng mga partido hinggil sa vaccination program ng bansa kontra COVID-19.
Gayundin ang masigurong standardized ang presyo ng mga bibilhing anti-COVID-19 vaccine at hindi magkakaroon ng pag-uulit ng mga babakunahang indibidwal.
