Hindi pa rin maaaring makalabas ng tahanan at maglagalag ang mga menor de edad sa Metro Manila.
Ito ang kinumpirma ni Metro Manila Development Authority (MMDA) General Manager Jojo Garcia batay sa napagkasunduan sa pulong mg mga Metro Manila mayors.
Ayon kay Garcia, unanimous ang desisyon ng mga alkalde sa National Capital Region (NCR) kung saan hindi nila pahihintulutang makalabas ng bahay ang mga may edad 17-taong gulang pababa.
Alinsunod na rin aniya ito sa ipinalabas na opinyon ng mga medical experts, partikular ng Philippine Pediatric Society sa usapin.
Dahil dito, mahigpit pa ring ipatutupad ang panuntunan sa ilalim ng general community quarantine (GCQ) kung saan tanging ang mga edad 18 hanggang 65-taong gulang lamang ang papayagang makalabas.
Nilinaw naman ni Garcia na maaari lamang makalabas ang 17-anyos pababa kung may mahalaga lamang silang gagawin o mag-eehersisyo.