Umapela ang isang commuters’ group sa Department Of Transportation (DOTr) at Toll Regulatory Board (TRB) na pagtuunan ng pansin ang sistema ng RFID sa halip na atupagin ang panghuhuli.
Ito’y kasunod ng itinakdang deadline para sa pagpapa-install ng RFID ng mga sasakyang dumadaan ng NLEX, SLEX at iba pang expressways sa Luzon.
Ayon kay Atty. Ariel Inton, President ng lawyers for commuters safety and protection, wala silang tutol sa pagpapa install ng RFID sa mga sasakyan dahil isa ito sa mga hakbang para maiwasan ang pagkalat ng COVID-19.
Ngunit ani Inton, sa nangayayari ngayon hindi ginhawa ang dulot nito sa mga motorista sa halip ay kalbaryo dahil sa napakahabang pila at mabagal na daloy ng trapikong naidudulot nito.
Maliban dito, nariyan din aniya ang mga reklamo gaya ng late activation, pagbabawas ng load sa hindi maipaliwanag na kadahilanan, hindi magamit sa ibang tollways ang RFID at marami pang iba.
Binanggit din ng grupo na mayroon nang babala ang TRB na maaari silang manghuli umano ng mga sasakyang wala pang RFID pagsapit ng Disyembre 2.
