Nagtakda na ng pulong ang Liberal Party (LP) upang kumpirmahin sa partido ang magiging running mate ni dating Department of Interior and Local Government (DILG) Secretary Mar Roxas sa 2016 elections.
Ayon kay Caloocan Congressman Edgar Erice ng Liberal Party, ikinatuwa nila ang deklarasyon ni Senador Grace Poe na tatakbo itong Pangulo sa 2016 dahil nagkaroon na sila ng pagkakataon na mag move on at mamili na ng ibang magiging running mate ni Roxas.
Sinabi ni Erice na binibigyan pa nila ng pagkakataon si Roxas na magmuni-muni at piliing mabuti ang gusto niyang makatambal sa eleksyon.
Maliban sa mga nauna nang nabanggit tulad ni Camarines Sur Representative Leni Robredo, kabilang rin aniya sa pinagpipilian sina Justice Secretary Leila de Lima at BIR Commissioner Kim Henares.
“Si Pangulong Aquino hanggang sa huli ay umasa doon sa sinabi ni Senator Poe na susunod siya sa kanyang payo, eh dahil dito ngayon po ay makakapag-move on naman po si Secretary Mar Roxas para makapili, bibigyan naman po natin ng pagkakataon ang mga anak ni Pangulong Aquino, yung mga kasama namin noong 2013 sa pagsusulong ng mga reporma, gusto niya po ay magkaisa lahat ng puwersa noon hanggang ngayon.” Paliwanag ni Erice.
By Len Aguirre | Kasangga Mo Ang Langit
