Inaasahang dadaong na sa Subic Bay Freeport ang BRP Gregorio Del Pilar (FF-15) ngayong araw.
Iyan ang inihayag ni Philippine Navy Flag Officer in Command Vice Admiral Robert Empedrad makaraang mabalahaw ang nasabing barko nang sumadsad ito sa Hasa-Hasa Shoal kamakailan.
Ayon kay Empedrad, nagkaroon ng pagbaha sa loob ng barko nang pasukin ito ng tubig habang hinihila papaalis sa naturang bahura subalit tiniyak nitong nabigyan din ng solusyon ang problema.
Kasunod nito, sinabi ni Empedrad na kaniya nang inatasan ang commanding officer ng naturang barko na tiyaking ligtas itong makararating sa pantalan ng Subic.
Pagdating duon, agad na ipapasok sa dry-dock o baradero ang naturang barko para isailalim sa pagkukumpuni gayundin sa isang komprehensibong imbestigasyon.
Ipinabatid pa ni Empedrad na nakatakda na talagang sumailalim sa repair ang FF-15 pero napaaga nga lang ito dahil sa pagkakasadsad sa naturang bahura.
—-
