Hawak na ng Caloocan City Police ang binatilyong suspek sa pagpaslang sa kapwa 14 na taong gulang na lalaki sa Caloocan City.
Naaresto ang suspek sa bahay ng kaniyang lola sa Bacoor City, Cavite matapos ang isang linggong pagtatago.
Ayon sa ulat, nagwawala pa ang suspek at nagbantang magpapakamatay kung ikukulong.
Gayunman nag-desisyon na ang kanyang mga kapatid na humingi ng tulong para maaresto ang suspek.
Batay sa CCTV footage, madaling araw ng Biyernes, Agosto 24 nang makita ang biktimang kinilalang si Rogelio Apron III na residente sa Barangay 144 na naglalakad habang sinusundan ng suspek na may hawak na kahoy at ilan pang lalaki.
Ilang sandali pa ay mag-isang pinuntahan ng suspek ang biktima at pinaghahampas ng kahoy habang tila nanonood lang ang ilan pang istambay at may kumukuha pa ng video.
Matapos nito ay tumakas na suspek at naiwan ang biktima na walang malay na isinugod pa sa ospital pero binawian din ng buhay matapos ma-comatose.
Sasampahan pa rin ng kasong murder ang suspek kahit menor de edad ito.— AR
—-
