Handa si Communications Assistant Secretary Mocha Uson na sagutin ang mga kasong isinampa ni Senador Antonio Trillanes IV laban sa kanya.
Matatandaang kinasuhan ni Trillanes si Mocha dahil umano sa pagpopost nito ng umano’y foreign bank accounts ni Trillanes na kinalaunan ay inamin naman ni Pangulong Rodrigo Duterte na gawa-gawa lamang.
Ayon Uson, malaya si Trillanes na gawin ang anumang naisin niya bilang mamamayan ng isang demokratikong bansa.
Nasa New York City sa Amerika ngayon si Uson bilang bahagi ng opisyal na delegasyon ng bansa sa United Nations General Assembly.
Sa kabila ng kasong kinakaharap ni Uson, naninidigan si Presidential Communications Secretary Martin Andanar na epektibong nagagawa ni Mocha ang kanyang trabaho lalo na pagdating sa social media.
Una nang iginiit ni Trillanes na kinasuhan nito si Uson upang maturuan ito ng leksyon dahil sa pagpapakalat nito ng fake news.
—-
