Pag-aaralan ng NHCP o National Historical Commission of the Philippines ang panukalang pagpapagawa ng multi-storey car park sa Burnham Park sa Baguio City.
Ayon sa NHCP, hiniling nito kay Baguio City Mayor Mauricio Domogan na huwag muna magsagawa ng anumang konstruksyon hangga’t walang inilalabas na desisyon ang ahensya.
Binigyang diin din ng NHCP na ang Burnham Park ay itinuturing na cultural property na kinakailangan maprotektahan at mapreserba alinsunod sa itinatalaga ng batas.
Ipinaliwanag naman ni Domogan na hindi sila magtatayo ng bagong parking space sa loob ng parke bagkus ay isasaayos lamang ang dati nang espasyo nito sa Ganza area.
Binigyang diin ng alkalde na kikita ang Burnham Park sa gagawing development sa car park nito na malaking tulong naman lalo’t self-sustaining ang naturang parke.
—-
