Humihingi ng milyun-milyong dolyar na ransom ang isang grupo ng mga hackers mula sa HBO.
Ito ay matapos na magbanta ang mga nasabing hackers na kanilang ipalalabas ang nakuhang buong kopya ng ilang television series ng HBO at ilang sensitibong file ng kumpanya.
Ayon sa pamunuan ng HBO, nagpadala ng limang minutong video ang isang Mr. Smith kay HBO CEO Richard Plepler na sinasabing nasa 1.5 terabytes ng mga hbo shows, mga kompidensyal at sensitibong mga dokumento ang kanilang nanakaw.
Hinihingi umano ng nasabing mga hackers ang ransom sa loob ng tatlong araw.
Sa kasalukuyan ay nakikipag-ugnayan na ang HBO sa mga pulis at cybersecurity experts para sa isinasagawang imbestigasyon ukol dito.
