Nakatakdang magsagawa ng city council meeting ang tumatayong OIC-Mayor at Vice Mayor ng Ozamiz City na sina second Councilor Girlet Luansing at third Councilor Michael Tagal.
Ito’y ayon kay Interior and Local Government Secretary Catalino Cuy, ay upang plantsahin ang kanilang pag-upo sa tungkulin matapos mapatay si Ozamiz Mayor Reynaldo Parojinog Sr. at maaresto si Vice Mayor Nova Princess Parojinog-Echavez.
Paliwanag ni Cuy, nakasaad sa batas na sina Luansing at Tagal ang uupong mayor at vice mayor bilang sumunod na pinakamataas na opisyal ng lungsod dahil hindi rin mahagilap ang first councilor na si Ricardo Parojinog.
“Dapat yung first councilor ang automatic na mag-aassume but then missing siya ngayon, may problema din siya kaya yung second councilor ang OIC Mayor diyan sa Ozamiz at yung third councilor naman ang OIC Vice Mayor, by operation of law ganyan ang mangyayari diyan.” Ani Cuy
Tiniyak rin ni Cuy na nakaalalay at nakikipag-ugnayan ang DILG sa mga lokal na opisyal ng Ozamiz City para siguraduhing magbalik normal ang operasyon ng lungsod.
“Ino-oversee lang namin yun, tinitignan namin na walang disruption ng public service, yung ating municipal local government operation officer pati yung provincial director natin diyan, at yung regional director ng DILG sa Region 10, nakikipag-coordinate sa current leadership ng city of Ozamiz. We want to see to it na hindi masyadong maaapektuhan ang day to day functioning ng city government.” Pahayag ni Cuy
By Krista de Dios | Ratsada Balita (Interview)