Nahaharap ngayon sa kakapusan ng suplay ng tubig ang mga residente ng Ormoc City sa Leyte matapos ang pagtama ng lindol doon.
Ayon kay Ormoc City Mayor Richard Gomez, mahina ang tubig sa kanilang lugar, bukod pa sa madumi ang lumalabas sa gripo.
Magtatayo anila sila ng emergency deep well o poso na gagana sa pamamagitan ng generator set.
Kasabay nito, sinabi ni Gomez na malaki ang posibilidad na magdeklara ng state of calamity ang Ormoc City government.
Power shortage
Wala pa ring suplay ng kuryente sa maraming lugar sa Visayas, bunsod ng magnitude 6.5 na lindol na naganap sa Leyte.
Ipinaliwanag ng NGCP o National Grid Corporation of the Philippines na hindi pa nila natapos ang testing sa kanilang substation sa Ormoc kahapon dahil sa malakas na buhos ng ulan sa lugar.
Tiniyak naman ng NGCP na agad itutuloy ang testing sa sandaling maging maganda na ang panahon ngayong araw.
Sakaling magiging maayos ang resulta ng gagawing testing, masusuplayan na ng kuryente galing sa Cebu ang mga lalawigan ng Samar, Leyte, Biliran, at Bohol.
By Meann Tanbio
