Daan-daang mga guro apektado ng Marawi crisis

Daan-daang guro ang apektado ng halos isang buwang bakbakan sa Marawi City, Lanao del Sur.

Ayon kay Education Secretary Leonor Briones, sa mahigit isanlibo apatnaraang (1,400) gurong hindi makalabas ng lungsod, isandaan pitumpu’t lima (175) ang nananatiling “unaccounted” o hindi pa rin nakikita at nakakausap.

Hindi pa anya nila mabatid kung ano na ang sitwasyon ng mga nasabing teacher at hindi pa rin masabi kung nawawala ang mga ito lalo’t nananatiling mahirap ang komunikasyon sa lungsod.

Tiniyak naman ni Briones na tinututukan na nila ang sitwasyon at patuloy na hinahanap ang mga nawawalang guro.

Tuloy pa ring makatatanggap ng suweldo ang mga gurong apektado ng kaguluhan sa Marawi City.

Ayon kay Education Secretary Leonor Briones, nauunawaan ng kagarawan ang pinagdadaanan ng mga guro gayundin ang mga estudyanteng naiipit sa bakbakan.

Bukod sa suweldo ay hindi rin mapapatid ang mga tinatanggap na benepisyo ng mga guro at mga non-teaching personnel sa pamamagitan ng ATM o Automated Teller Machine.

Sakali naman aniyang nawala ang ATM ng mga ito ay gagawan ng paraan ng ahensya na mabilis na mailabas ang sahod.

Samantala, tinanggal na rin ng DepEd ang mga requirements na karaniwang hinahanap sa mga estudyanteng nagta-transfer gaya ng report card, authenticated birth certificate at iba pa.

Mahigpit din ang tagubilin ng DepEd sa mga guro na bantayan ang mga transferees mula Marawi City upang matiyak na hindi sila magiging biktima ng pambu-bully.

By  Drew Nacino

Comments

comments