Isinapubliko na ng Land Transportation Office o LTO ang disenyo ng mga ipalalabas na bagong driver’s license card.
Ngunit taliwas sa nakagawiang disenyo ng lisensya, may inilaan nang kulay para sa iba’t-ibang uri ng lisensyang ipalalabas ng LTO depende sa classification nito.
Kulay asul sa professional at non-professional drivers license, kulay dilaw para sa conductor’s license habang orange naman para sa student permit.
Bukod sa kulay, may mga karagdagan ding security features ang mga nasabing lisensya tulad ng enhanced resolution at mas malaking letra para sa pangalan at address ng driver.
Nawala na rin ang Philippines at millenium tags na nakasulat sa itaas at gitnang bahagi ng watawat ng Pilipinas na naka-imprenta sa lisensya.
Kasunod nito, inihayag ni LTO Spokesman Jason Salvador na hiniling nila sa Department of Finance na aprbuhan ang petisyong nagbababa sa presyo ng license fee sa P70 pesos mula sa dating P150 pesos.
By Jaymark Dagala
