Tuluy na tuloy na ang pagbili ng 48 bagon ng MRT.
ito’y matapos katigan ng Court of Appeals ang pasya ng Makati Regional Trial Court Branch 66 na nagbabasura sa hiling na Preliminary Injunction na isinampa ng Metro Rail Transit Corporation at Metro Rail Transit Holdings sa mababang hukuman laban sa DOTC.
Base sa 16 na pahinang desisyon ng 12th Division ng CA, ibinasura nito ang apela ng MRTC at MRTH laban sa P3.76-Bilyong kontrata na inaward sa Dalian Locomotive and Rolling Stock.
Sinabi ng Apelate Court na walang matibay na ebidensya na magkakaroon ng Grave Injustice at Irreparable Injury sa MRTC dahil self-serving lamang ang mga pahayag nito at wala ring naiprisentang independent witness para patibayan ang kanilang reklamo.
Matatandaang sa kanilang petisyon sa Makati RTC, inilahad ng MRTC at MRTH na nilabag ng DOTC ang kanilang Right to First Refusal nang i-award ang kontrata para sa MRT-3 Expansion Project sa Dalian Locomotive.
Nakasaad sa pasya ng CA na dahil sa alegasyon ng MRTC na nalabag ang kanilang karapatan sa ilalim ng konstitusyon, hindi nangangahulugan na kaagad maglalabas ng Injunctive Relief ang korte.
Idinagdag pa ng CA na dahil sa nagpapatuloy na Arbitration sa usapin, hindi pa mabatid kung may right of first refusal ang MRTC kaya hindi tama ang pagpapalabas nito ng injunction.
By: Meann Tanbio
