Kinontra ng ilang law experts ang Malakanyang sa isyu na hindi kailangan ang pag sang ayon ng Senado para pawalang bisa ang isang international treaty o kasunduan.
Ayon kay Atty. Melencio Sta. Maria Jr., Dean ng Far Eastern University (FEU) Institute of Law, nakalagay sa konstitusyon na kailangang ratipikahan ng Senado ang isang tratado.
Ang probisyong ito anya ay mayroong implikasyon na kailangan rin ang pag sang ayon ng Senado kapag pinawalang bisa ang tratado.
Sa panig ni Father Ranhilio Aquino, Dean ng San Beda Graduate School of Law, iminungkahi nitong magpadala ang Senado ng resolusyon sa Malakanyang para pormal na iparating na kailangan ng pagsang ayon mula sa Senado bago mapawalang bisa ang isang tratado.
Ito anya ang unang hakbang bago kuwestyonin sa Korte Suprema ang pagpapawalang bisa ng Pangulong Rodrigo Duterte sa Visiting Forces Agreement (VFA) nang walang basbas ang Senado.
Binigyang diin ni Aquino na ang isang tratado o kasunduan ay likha ng Kongreso sa pamamagitan ng Senado at ng pangulo ng bansa kayat hindi puwedeng solohin ng pangulo ang kapangyarihang bawiin o ipawalang bisa ito.
