Walang plano si Senador Manny Pacquiao na tumakbo sa mas mataas na posisyon sa gobyerno.
Ito ang pahayag ni Pacman kasunod ng paglutang ng posibleng tandem nila ni Presidential daughter at Davao City Mayor Sara Duterte para sa 2022 elections.
Ayon kay Pacquiao, ngayon ay nag-aaral siya para makatapos at makakuha ng degree sa kolehiyo.
Aniya, ito ang kanyang paraan para mas maintindihan at masolusyon ang problema ng bansa partikular sa lagay ng ekonomiya ngayon.
Sa edad niyang 40-anyos ay pasok na si Pacquiao sa minimum age na itinatakda ng Saligang Batas para maging Pangulo ng bansa.
Bukod sa kanyang tagumpay sa pulitika ay patuloy rin ang kanyang pamamayagpag sa larangan ng boksing kung saan huling napatumba niya si Adrien Broner sa kanilang laban noong Enero sa Las Vegas, Nevada.
‘Inday Sara’
Samantala, hindi pa handa si Davao City Mayor Sara Duterte na magsalita kaugnay sa kanyang pagtakbo bilang pangulo sa 2022.
Ito ay kahit pa suportado ng maraming senador ang posibilidad na pagsabak ni Inday Sara sa eleksyong pam-panguluhan.
Ayon kay Mayor Sara, ang pagtakbo sa pagka-pangulo ay kailangan na pag-isipan na mabuti.
Posible aniyang magdesisyon siya ukol dito sa Enero 2021 anim na buwan bago ang filing for candidacy para sa 2022 presidential elections.
—-