Puspusan na operasyon ng QCPD o Quezon City Police District Office laban sa iba’t ibang klase ng sugal.
Ayon kay Chief Supt. Guillermo Eleazar, Direktor ng QCPD, numero uno sa kanilang target ang mga nasa likod ng loteng at mga online gambling na wala namang lisensya mula sa Philippine Amusement and Gaming Corporation (PAGCOR).
Sinabi ni Eleazar na hindi rin nila palalampasin ang iba pang uri ng sugal na nakakasira sa mga kabataan tulad ng sakla at maging ang cara y cruz.
“Itong mga kabataan natin na nalululong sa ganito habang maaga pa ay mabigyan na sila ng impormasyon at aksyon na hindi na sila malulong sa ganitong bisyo na pinagsisimula ng iba pang klaseng krimen kaugnay sa droga at iba pang petty crimes.” Pahayag ni Eleazar.
Samantala, labing tatlo (13) katao ang nasampolan nang pinaigting na kampanya ng gobyerno kontra iligal na sugal.
Ayon sa Philippine National Police (PNP), apat sa mga ito ay mula sa Quezon City habang siyam (9) sa Central Luzon.
Kinilala ng Quezon City Police District ang mga naaarestong sina Annie Santos, Rolando Santos, Benito Dizon at Carlito dela Cruz na sinasabing mga kolektor ng jueteng sa Sauyo Road, Novaliches.
Nakuha sa mga ito ang higit dalawang libong (2,000) cash at listahan ng mga taya.
Naaktuhan naman ng PNP Region 3 ang jueteng financier at operator habang nagbobola ng resulta sa Orani, Bataan.
Ilan pa ang naaresto dahil sa paglalaro ng sakla sa Bamban , Bataan at cara y cruz o illegal coin game sa San Jose Belmonte, Bulacan.
By Len Aguirre | Ratsada Balita (Interview) | Rianne Briones
