Kumpiyansa ang PT&T o Philippine Telegraph and Telephone Corporation na makipagkumpitensya sa malalaking mga Telco players anuman ang magiging kalalabasan ng kanilang pakikipag-usap sa isang kumpaniya mula China.
Ayon kay PT&T Chairman Salvador Zamora, itinuturing na nila ang kanilang kumpaniya bilang De Facto third player sa industriya na kayang makipagsabayan sa dalawang higanteng Telco tulad ng Globe at PLDT.
Sinabi pa ni Zamora na halos nagsisimula pa lamang ang kanilang negosasyon ng Chinese Telco at may ibang lokal na mga kumpaniya rin aniya itong kinakausap.
Kasunod nito, umaasa naman si Zamora na kanila pa ring makukuha ang kontrata para sa national broadband kasama man nila o hindi ang Chinese Telco firm.