Muling bubuhayin ng DOJ o Department of Justice ang kanilang imbestigasyon hinggil sa maanomalyang Pork Barrel Fund Scam at ang kontrobersyal na Disbursement Acceleration Program.
Ito’y bilang pagtalima na rin sa pagnanais ni Pangulong Rodrigo Duterte na halungkatin ang nasabing usapin upang malantad ang iba pang mga nakinabang sa paglustay sa pondo ng bayan.
Paglilinaw naman ni Justice Secretary Vitaliano Aguirre, hindi na kailangan ng permiso mula sa Ombudsman dahil isa itong panibagong imbestigasyon.
Wala rin aniyang selective justice sa gagawin nilang imbestigasyon at hindi rin aniya nila gagamitin si Pork Barrel Scam Queen Janet Lim Napoles para ipambala sa oposisyon.
Basta’t may ebidensya, tiniyak ni Aguirre na kanilang hahabulin ang lahat ng mga sangkot sa anomalya maging ito man ay miyembro ng oposisyon o administrasyon man.
By: Jaymark Dagala