Mariing kinundena ni Miss Universe 2015 Pia Wurtzbach ang ginawang pagsasapubliko ng Philippine Drug Enforcement Agency (PDEA) at media sa mga nahuling labing isang (11) kalalakihan sa ginawang buy bust operation sa Taguig.
Kung saan pinangalanan ng PDEA ang mga naaresto at inilabas din sa social media ang mga larawan nito.
At, tinukoy pa ng naturang ahensya na nag – positibo sa HIV ang isa sa mga suspek.
Sa isang post ni Pia sa Instagram, nagpahayag ito ng kanyang hinaing sa naging aksyon ng ahensya at media.
Aniya, ayon sa RA 8504 o ang Philippine AIDS Prevention and Control Act of 1998, hindi dapat i-anunsyo ang pagkakaroon ng HIV ng isang tao.
Dagdag pa ni Pia, hindi lamang trauma sa mga naaresto ang maidudulot nito kundi mapapalala pa nito ang “HIV situation” sa bansa.
Binigyang – diin naman ng beauty queen na hindi krimen ang pagiging LGBT at hindi parusa ang pagkakaroong ng HIV.
Sa huli, nanawagan si Pia sa PDEA at media na gumawa ng hakbang kaugnay sa insidente.
Habang pinayuhan naman nito ang publiko na huwag husgahan ang mga taong may HIV at respetuhin ang LGBT.