Tiwala ang kampo ni Supreme Court Chief Justice Maria Lourdes Sereno na kikilalanin ng Senado na gaganap bilang impeachment court ang karapatan ng Punong Mahistrado at bibigyan ito ng patas na paglilitis.
Ito’y ayon kay Atty. Josa Deinla, abogado ni Sereno ay sa kabila ng inaasahan nilang hindi pantay pa trato ng House Committee on Justice kay Sereno na pawang mga kaalyado aniya ni Pangulong Rodrigo Duterte.
Binira rin ni Deinla ang Justice Committee sa Kamara sa pagiging bias nito sa karapatan ng Punong Mahistrado dahil sa simula’t simula pa lamang ay tila nahatulan na ito.
Sa huli, muling binigyang diin ni Deinla na malinaw na isang paglabag sa Saligang Batas ang pagpapatalsik sa sinumang opisyal ng pamahalaan lalo’t kung pawang mga gawa-gawa at hindi totoo ang mga ebidensyang nagdiriin sa kanila.
Articles of Impeachment
Nakatakda nang pagbotohan sa darating na Huwebes, Marso 8 ng House Committee on Justice kung may probable cause ang isinampang impeachment laban kay Supreme Court Chief Justice Maria Lourdes Sereno.
Kahapon, sinabi ni House Justice Committee Chairman at Mindoro Representative Reynaldo Umali na ikinakasa na nila ang draft ng articles of impeachment o ang mga ilalatag na argumento para sa paglilitis.
Tinatayang aabot aniya sa 40 mambabatas buhat sa Mababang Kapulungan ang nagpahayag ng kanilang pagnanais na tumayong taga-usig ng Punong Mahistrado.
Binigyang diin pa ni Umali na mahalagang mabatid ang porma gayundin ang apat na batayan para patalsikin si Sereno bilang Punong Mahistrado ng kataas-taasang hukuman.
Kasunod nito, irerekomenda rin ni Umali na tumayong chief prosecutor si House Majority Leader at Ilocos Norte Representative Rodolfo Fariñas dahil sa taglay aniya nito ang sapat na karanasan.
—-