Nagbabala si Pangulong Rodrigo Duterte na mapipilitan siyang gamitin ang kaniyang kapangyarihan bilang presidente kapag hindi pa aniya naaksyunan ng mga ahensya ng gobyerno na responsable sa nararanasang krisis sa tubig sa Metro Manila at mga karatig lalawigan.
Sa ambush interview, sinabi ng pangulo na kaniya nang pinag-aaralan ang lahat ng paraan at opsyon para solusyunan ang problema sa tubig kahit pa umano gamitin niya ang kaniyang kapangyarihan.
“I have appointed enough men of equal talent to deal with the problem. I don’t know kung saan sila kukuha, basta ang sa akin, you produce water. You (water concessionaires) have every right to protest if it really, would place your place in jeopardy, but if the safeguards are there, tapos between your concerns and the crisis that we are trying to avoid, I will use the extraordinary powers of the presidency,” ani Duterte.
Kung sakali aniyang lumala pa ang problema rito handa siyang i-take over ang pamamahala at siya na ang mag-uutos kung ano ang dapat gawin.
“I will go and operate it myself. I will take over and I will direct what to do. Ganoon lang ‘yan. Hindi niyo kaya? O sige ako. umalis kayo diyan. I could not just allow people to go about without water even for drinking. You just place the safeguards. It might create some danger or damage but that is not my concern. My concern is the welfare, the greatest good for the greatest number. That is democracy,” ani Duterte.
Magugunitang nagpatupad muli ngayong Oktubre ang Maynilad at Manila Water ng rotational water service interruption dahil sa pagbaba ng lebel ng tubig sa Angat Dam.
Marso nang unang maranasan ng milyong kabayahan sa Metro Manila at mga karatig lalawigan ang krisis sa tubig dahil sa El Niño.