Posibleng may grupo umano ng mga kriminal ang kumikilos upang magkaroon ng pagkakahati-hati ang mga Pilipino at upang mawalan ng kredibilidad ang giyera kontra kriminalidad ng pamahalaan.
Ayon kay Presidential Spokesman Harry Roque, mayroong mga grupo na gustong harangin ang mas pinaigting pang kampanya ng pamahalaan para mapuksa ang mga kriminal.
Tugon ito ni Roque sa panawagan ni Lingayen Dagupan Archbishop Socrates Villegas sa Pangulong Rodrigo Duterte na itigil ang berbal na pag-atake sa Simbahang Katoliko dahil posibleng makahikayat ito ng krimen kontra sa mga pari.
Kinukundena anya ng Malacañang at naglunsad na imbestigasyon sa pagpatay kina Father Mark Ventura, Father Marcelito Paez at Father Richmond Nilo.
Sinabi ni Roque na makikipag-ugnayan ang Philippine National Police sa pamunuan ng Simbahang Katoliko upang makabuo ng mga hakbang kung paano bibigyan ng proteksyon ang mga pari.
—-