Pinaiimbestigahan ni Lanao del Norte Representative Khalid Mohamad Dimaporo ang ginawang pagtanggal ng NAPOLCOM o National Police Commission sa deputation ng mga lokal na opisyal sa Mindanao.
Ito’y matapos maglabas ng memorandum ang NAPOLCOM para maalisan ng deputation ang pitong gobernador at 132 na alkalde dahil umano sa kabiguan na mapigilan ang mga terorista sa kanilang mga nasasakupan.
Tahasang sinabi ni Dimaporo na pagta-traydor ang ginawa ng NAPOLCOM sa mga kaalyadong LGU o local government unit dahil sa walang basehan ang sinasabing kinunsinte ng mga ito ang terorismo.
Nais ni Dimaporo na ipatawag ng Kamara ang mga opisyal ng NAPOLCOM at ipaliwanag kung bakit inalisan ng administrative control ang mga LGU sa Mindanao sa lokal na pulisya.
- Meann Tanbio