Hindi tanggap o kabilang sa kultura ng Pilipinas ang paghalik sa labi ng isang babae para lamang pasayahin ang mga manonood.
Ito ang iginiit ng Gabriela Women’s Party-list Group matapos maliitin lamang ni Presidential Spokesperson Harry Roque ang ginawang paghalik ni Pangulong Rodrigo Duterte sa labi ng isang Pinay sa harap ng Filipino community sa South Korea.
Ayon kay Gabriela Women’s Party Representative Arlen Brosas, ang ginawa ng Pangulo ay bahagi ng aniya’y bulok na misogynist culture na ipinakikila at ginawang normal nito sa kanyang mga talumpati at pagkilos sa harap ng publiko.
Binigyang diin din ni Brosas na hindi usapin sa kontrobersiyal na paghalik ng Pangulo ang pagbibigay ng pahintulot ng Pinay kundi ang pagpapakita nang machismo ng pinakamataas na opisyal ng Pilipinas sa harap ng mga Filipino at buong mundo.
Dagdag pa ng mambabatas, ginagamit lamang ni Pangulong Duterte ang mga kababaihan para makakuha ng atensyon sa media at mapagtakpan ang kabiguan nitong maitaas ang istado ng mga babae at mga OFW.
—-