Kinumpirma ng isang opisyal ng National Food Authority (NFA) na ubos na ang suplay ng mga bigas nila sa mga bodega sa Metro Manila at ilang lalawigan sa bansa.
Ayon kay Arnel Alfonso, Provincial District Manager ng North District Office ng NFA, pag-mamay-ari na lamang ng Department of Social Welfare and Development (DSWD) ang mangilan-ngilang sako ng bigas na natitira sa kanila.
Maliban sa Metro Manila, nagkakaubusan na rin aniya ng suplay ng NFA rice sa Ilagan City sa Isabela, Virac sa Catanduanes, Bataan, at Zamboanga City.
Sinabi pa ni Alfonso na mayroon na ring ilang may-ari ng outlet ng NFA rice ang nagsara dahil wala nang maibentang murang bigas.
Una rito, inamin ng NFA sa mga nakaraang pagdinig ng Senado na hanggang Abril at Mayo na lang tatagal ang suplay ng NFA rice sa bansa.
—-