Pinag-aaralan ng pamunuan ng Ninoy Aquino International Airport (NAIA) ang posibleng pagsasampa ng kaso laban sa isang concessionaire matapos bumagsak ang kisame nito.
Isang Filipino American na pasahero at isang construction worker ang nasugatan sa nasabing aksidente sa Sweet Ideas Restaurant kahapon ng umaga.
Ayon kay NAIA Terminal 3 Manager Engr. Octavio Lina, responsibilidad ng concessionaire ang konstruksyon ng kisame at titinangnan pa rin nila kung sinunod nito ang plano.
Ipinasara muna ang nasabing restaurant na nagsimulang mag-operate sa NAIA 3 noong 2008 habang iniimbestigahan pa ang pagbagsak ng kisame nito.
Kasabay nito, ipinabatid ni Lina na personal siyang humingi ng paumanhin sa pasaherong si Adam Warner Day at pamilya nito bago umalis ang mga ito pabalik ng Amerika.
Magugunitang 2014 nang bumagsak din ang kisame sa NAIA Terminal 1 matapos mahulog sa butas ang isang construction worker.
By Judith Larino
READ: Kisame sa isang bahagi ng NAIA Terminal 3 gumuho
