Dalawang oras mas maagang nasimulan ang prusisyon ng Itim na Nazareno ngayong taon kumpara noong 2015.
Ayon sa hepe ng Manila Police District (MPD) na si Police Chief Superintendent Rolando Nana, mas mabilis kasi ang paglipat at pagkabit sa Poong Nazareno sa andas nito.
Bago pa man sumapit ang alas-6:00 ng umaga kanina, nagsimula na ang prusisyon na dinadaluhan ng milyun-milyong deboto.
Di hamak na mas maaga aniya ito kumpara sa alas-8:00 ng umaga na pagsisimula noong nakaraang taon.
Dagdag pa ni Nana, mas organisado ang traslacion ngayong taon kumpara noong 2015.
Sa taya ng MPD, mayroong mahigit 1 milyong deboto ang nagtipon-tipon sa Quirino grandstand kanina, sa pagsisimula ng traslacion.
PNP
Samantala, patuloy ang pagsita ng mga pulis sa mga tumutungo sa Maynila na may dalang mga bagay na dapat inspeksyunin at mga ipinagbabawal.
Ayon kay Manila Police District (MPD) Head Police Chief Supt. Rolando Nana, bawal ang paggamit ng selfie stick at bawal sumali sa traslacion ang mga lasing.
Pakiusap naman ng MPD sa mga deboto huwag nang magsuot pa ng bull cap lalo na kapag sumapit ang gabi.
Patuloy din umanong mag-iinspeksyon ang Kapulisan sa mga taong may dalang backpack.
Una nang sinabi ng Kapulisan, na hanggat maari transparent na bag na lamang ang gamitin sa araw ng traslacion.
By Jonathan Andal