Laglag sa kamay ng pinagsanib na puwersa ng pulisya at militar ang isang mataas na lider ng CPP-NPA o Communist Party of the Philippines New People’s Army sa Brgy. Sta Quiteria, Caloocan City.
Ang nasakoteng suspek ay kinilala ni PNP Spokesman Senior Supt. Dionardo Carlos na si Ferdinand Castillo, Secretary ng Metro manila Regional Party Committee.
Sinasabing isinailalim sa surveillance operations si Castillo bago nadakip ng Criminal Investigation and Detection Group-National Capital Region at Intelligence Service Group ng Philippine Army.
Nahulihan din ng isang cal. 45 pistol si Castillo na may kasong double murder at multiple attempted murder.
8 umanong miyembro ng NPA timbog sa Sarangani Province
Timbog din ang walong (8) umano’y miyembro ng NPA o New People’s Army habang isang rebelde naman ang kusang-loob na sumuko sa militar sa Alabel, Sarangani Province.
Kabilang sa mga nahuli ng mga sundalo sa Sitio Tangis, Brgy. Datal Anggas sina Simeon Salda, Jun Moda, Claude Palbe, Garzon Palbe, Rene Ompao at Sabelo Colano na sinasabing mga bagong recruit ng NPA.
Arestado rin sina Nonoy Sanama at Morelo Sanama sa Sitio Solutan habang boluntaryong sumuko ang isang itinatago sa alyas na Kaloy.
Narekober mula sa mga rebelde ang iba’t ibang matataas na kalibre ng baril.
By Jelbert Perdez