Nakatakdang mag-face off sa House Committee on Metro Manila Development sina Manila Mayor Joseph Estrada at dating Manila Mayor Alfredo Lim.
Ipatatawag ng komite sina Estrada at Lim upang magbigay linaw sa palitan nila ng alegasyon na mayroong tumanggap ng suhol kaya’t pinayagang itayo ang 49 na palapag na Torre de Manila.
Matatandaan na inakusahan ni Lim si Estrada ng pagtanggap ng suhol kapalit ng pagpayag na itayo ang Torre de Manila na 7 beses na mataas sa itinakdang height limit sa kapaligiran ng Luneta Park.
Buwelta naman ni Estrada, si Lim ang nag-apruba ng building at zoning permit para sa DMCI noong Mayor pa ito ng Maynila.
Ayon kay Quezon City Cong. Winston Castelo, Chairman ng komite, nais nilang malaman kung sino ang responsable kung bakit natuloy ang konstruksyon ng 49-storey Torre de Manila sa kabila ng cease and desist order ng National Commission for Culture and Arts noong Enero ng taong ito.
Binigyang diin ni Castelo na mayroong mga malinaw na paglabag ang DMCI sa pagpapatayo ng Torre de Manila kaya’t isusulong ng kanyang komite na maging permanente ang pagpigil ng korte sa konstruksyon at mapa-demolish ang gusali.
By Len Aguirre