Naniniwala si dating Sen. Rodolfo Biazon na kailangan nang pumasok ng Korte Suprema sa isyu ng pagkansela ng pamahalaan sa Visiting Forces Agreement (VFA).
Ayon kay Biazon, kailangan aniyang mayroong maghain ng petisyon sa high tribunal para linawanagin nito ang itinatadhana ng saligang batas sa pagkansela ng isang kasunduan o tratado.
Giit ni Biazon, bagama’t nakasaad naman sa konstitusyon na kailangang may pagsang-ayon mula sa Senado ang mga pinapasok na kasunduan ng Pilipinas, hindi naman aniya malinaw kung ganito rin ba ang proseso sa pagkansela nito.
Sa panig naman ni dating Sen. Francisco Kit Tatad, kung itinatakda ng saligang batas na magkatuwang naman ang ehekutibo at Senado sa pinapasok na kasunduan ng bansa, nararapat lamang na magkasama rin ito sa pagbasura.
