Maaaring bigyan ng kapangyarihan ng Kongreso si Pangulong Rodrigo Duterte para i-take over ang operasyon ng mga public utilities tulad sa tubig.
Ito ang inihayag ni Senador Panfilo Lacson, sa harap na rin ng ipinatutupad na rotational service interruption ng dalawang water concessionaires sa Metro Manila.
Gayunman, iginiit ni Lacson na bago ito maipagkaloob ng Kongreso, dapat munang magdeklara ng emergency power ang pangulo.
Oras naman aniyang mabigyan na ng kapangyarihan ang pangulo, dapat ding nakahanda ang pamahalaan na bayaran ang posibleng magiging lugi ng Maynilad at Manila Water sa panahong pinatatakbo ito ng gobyerno.
Una nang imimungkahi ni Senador Koko Pimentel ang pagrepaso sa pinasok na concession agreement ng pamahalaan sa Maynilad at Manila Water. — ulat mula kay Cely Ortega- Bueno (Patrol 19)