Patay ang isang British pilot matapos bumagsak ang pinalilipad nitong eroplano sa isang palayan sa Barangay Lapaz sa Arayat, Pampanga.
Kinilala ang biktima na si Mark Hogget, 55 anyos at residente ng Camella Homes sa Tarlac City.
Ayon sa Arayat Police Station, nakatanggap sila ng ulat mula sa kapitan ng Barangay Lapaz Turo hinggil sa bumagsak na two-seater plane sa lugar pasado alas 4:45 ng hapon, kahapon.
Batay naman sa kwento ng mga testigo, lumilipad sa bahagi ng barangay ang nabanggit na eroplano nang bigla itong umikot at saka bumagsak.
Patuloy namang inaalam ng mga otoridad ang dahilan sa pagbagsak ng nasabing eroplano na may body number R-P-S 2785 at pag-aari ng Angeles Flying Club.
