Nasagip ng militar ang isang Pilipinong bihag ng Abu Sayyaf Group sa Sitio Budjang, barangay Libog Kabao, Panglima Estino, Sulu kahapon ng hapon.
Kinilala ito na si Blas Jackosalim Ahamad, na isa sa 4 na indibiduwal na dinukot noong April 29 sa Patikul Sulu.
Kasama niya noong nadukot ang 2 babaeng pulis na sina PO3 Benierose Alvarez at PO1 Dinah Gumahad at isa pang sibilyan na kinilalang si Faizal Ahidji na pinalaya naman na noon pang Sabado.
Ayon kay Brigadier General Cirilito Sobejana, Commander ng Joint Task Force Sulu, nakatulong ang impormasyong nakuha nila kay Ahidji sa pagkaka-rescue kahapon kay Ahamad.
Isinasailalim na ito ngayon sa custodial debriefing.
Sa kasalukuyan, hawak pa rin ng Abu Sayyaf ang 2 babaeng pulis, 5 Pilipino at 5 banyagang bihag.
—-