Tuloy ang ginagawang imbestigasyon at pag-otopsiya ng Public Attorney’s Office o PAO sa labing limang (15) bata na hinihinalang namatay matapos magkaroon ng ‘severe dengue’ dahil sa dengvaxia.
Binigyang diin ni Atty. Percida Acosta, na malinaw na nakasaad sa Republic Act 9406 na tungkulin ng PAO na bigyan ng legal at mabilis na tulong ang mga dumudulog sa kanilang tanggapan.
Ayon kay Acosta, tanging ang hukuman ang maaaring magsabi kung kwalipikado o hindi ang kanilang forensic consultant si Dr. Erwin Erfe na magsagawa ng autopsy at hindi mga kapwa doktor dahil ‘unethical’ aniya ang ganuong panghuhusga.
Ipinaliwanag ni Acosta na bukod kay Erfe, mayroong dalawang (2) pathologist at ilan pang internal medicine experts ang tumutulong sa ginagawa nilang otopsiya.
Bukod dito, ipinabatid ng PAO na idudulog ng mahigit sa isandaang (100) pamilya sa Pangulong Rodrigo Duterte ang pagbakuna ng dengvaxia sa kanilang mga anak.
Ayon kay Atty. Percida Acosta, nagpasya ang mga pamilyang dumudulog sa kanila na sulatan ang Pangulo matapos manawagan ang ilang health experts na itigil ang otopsiyang ginagawa ng PAO sa mga nasawi sa dengue sa kabila ng pagbakuna sa kanila ng dengvaxia.
Una nang idineklara ng PAO na malalang dengue ang ikinasawi ng mga batang nabakunahan ng dengvaxia.
