Blangko pa ang Armed Forces of the Philippines (AFP) kung anong grupo ang dumukot at kung saan dinala ang 10 Indonesian sailors na dinukot sa bahagi ng karagatang sakop ng tinatawag na ZAMBASULTA o Zamboanga, Basilan, Sulu at Tawi Tawi.
Ayon kay Brig. General Restituto Padilla, Spokesman ng AFP, wala pa silang kumpirmasyon na Abu Sayyaf ang dumukot sa 10 Indonesian sailors dahil marami nang kidnap for ransom groups ang nag-ooperate sa bahagi ng ZAMBASULTA.
Sinabi ni Padilla na hawak na nila ang listahan ng mga nadukot na crew na nakuha nila sa natagpuang tugboat na ginamit sa kidnapping subalit hindi ito puwedeng isapubliko hanggat hindi nila nakukumpirma sa may-ari ng barko at kung naipagbigay alam na ang insidente sa pamilya ng mga biktima.
Inaalam na rin anya nila sa may-ari ng barko kung totoo ang ransom demand ng kidnappers na 50 milyong piso.
LISTEN: Bahagi ng panayam kay AFP Spokesman Brig. General Restituto Padilla
By Len Aguirre | Ratsada Balita