Aabutin ng 236 million Pesos ang malulugi sa Department of Transportation sakaling ipatigil pansamantala ang operasyon ng Metro Rail Transit Line 3.
Ayon kay Transportation Undersecretary for Rails Cesar Chavez, ang nasabing halaga ang kinikita ng MRT-3 kada buwan at ito rin ang idaragdag sa hihingin na subsidy sa gobyerno bilang equity rental payment sa M.R.T.C.
Nasa 2.7 bilyong Piso anya ang ibinabayad ng pamahalaan sa Metro Rail Transit Corporation kada taon sa ilalim ng build-lease-transfer agreement na nilagdaan noong 1997.
Ngayong taon ay naglaan ang gobyerno ng 4.8 billion Pesos na subsidy para sa maintenance at operations ng MRT-3.
Aminado si Chavez na bagaman kanilang seryosong ikinukunsidera ang temporary shutdown, nangangamba sila sa malaking epekto nito sa pinansyal na aspeto.