Lumagda sa isang memorandum of agreement o MOA ang Department of Health (DOH) at Commission on Elections (COMELEC) kaugnay ng gaganaping national at local elections sa Mayo 9.
Ito, ayon kina DOH Secretary Janette Garin at COMELEC Chairman Andres Bautista, ay upang matiyak na magiging maayos at ligtas ang darating na halalan.
Kabilang sa sinasabing prayoridad na polling places ay mga lugar na dagsa ang bilang ng mga botante, mga presinto na maraming senior citizen at persons with disabilities o PWD’s.
Maglalagay din ang DOH ng mga health stations sa bawat probinsya para pagsilbihan ang mga botante.
Ayon pa kay Garin, bilang bahagi ng kasunduan ay naghahanap at nangangailangan ang DOH ng 10,000 volunteers na tutulong sa ahensya sa eleksyon.
Mahigit naman sa P35 milyong piso ang ibubuhos ng Department of Health para sa kanilang mga programa at aktibidad sa araw ng eleksyon.
Ito ang tiniyak ni Health Secretary Janette Garin matapos lumagda ang DOH sa isang memorandum of agreement kasama si COMELEC Chairman Andres Bautista.
Ayon kay Garin, gagamitin ang pondo hindi lamang para sa mga magkakasakit na botante sa mismong halalan kundi maging para sa libreng hospitalization ng mga election worker.
Bukod naman sa DOH, nakipagkasundo o lumagda rin sa MOA ang COMELEC sa ‘Pag-IBIG Fund’.
PNP fund
Samantala, hindi pa rin natatanggap ng Philippine National Police o PNP ang kanilang hininging pondo para sa darating na eleksyon.
Ayon kay PNP Chief Dir. Gen. Ricardo Marquez, P800 milyong pisong budget ang kanilang inihirit sa COMELEC pero hindi pa umano nila ito nakukuha.
Kaya naman, nais malaman ng PNP kung may kinalaman ba ang mga hindi pa napagsasama-samang liquidation ng kanilang pondo noong mga nakaraang eleksyon sa pagkakaantala ng hinihingi nilang budget ngayong halalan.
Sinabi ni Marquez na gagamitin ang pondong ito para sa allowance ng kanilang mga tauhan na ide-deploy sa mga polling precinct, gasoline expenses, checkpoint operations, at sa paglilipat ng mga election paraphernalia.
Dahil dito, humuhugot muna ng pondo ang PNP mula sa kanilang regular na maintenance and other operating expenses o MOOE para sa nabanggit na gastusin simula pa noong Enero 10 ng taong kasalukuyan.
By Jelbert Perdez | Allan Francisco | Jonathan Andal