Inamin ng BSP o Bangko Sentral ng Pilipinas na sa kanila nga nagmula ang mga faceless o walang mukhang isandaang pisong papel na nagviral sa social media.
Ayon kay Carlyn Pangilinan, managing director ng BSP Currency Management Sub-Sector, nagkaroon aniya ng aberya sa makinang nag-iimprenta ng pera kaya nawala ang mukha ni Dating Pang. Manuel Roxas sa naturang salapi.
Nakikipag-ugnayan na rin sila sa netizen ng viral photo para kuhanan ng iba pang detalye subalit hindi nito sinasagot ang kanilang tawag.
Gayunman, hinimok ng BSP ang publiko na agad ibalik sa kanila ang anumang salaping walang mukha na kanilang makukuha mula sa mga bangko.