Lumakas pa at isa nang tropical storm ang bagyong Florita habang patuloy na kumikilos sa direksyon pa-hilagang kanluran sa bilis na 11 kilometro kada oras.
Huling namataan ang bagyo sa layong 860 kilometro Silangan ng Basco, Batanes.
Taglay nito ang lakas ng hanging aabot sa 65 kph malapit sa gitna at pagbugsong papalo sa 80 kph.
Ayon sa PAGASA, hindi inaasahang tatama sa lupa ang bagyo bagama’t palalakasin nito ang habagat na magdadala ng mga pag-ulan sa bahagi ng extreme northern Luzon ngayong weekend.
Batay sa pagtaya ng PAGASA, lalabas ng Philippine Area of Responsibility o PAR ang bagyo sa Linggo ng umaga.
Sa ngayon ay wala namang nakataas na tropical storm warning signal sa buong bansa. —AR
—-
