Tutol ang isa sa mga abogado ni dating Pangulong Gloria Arroyo na si Atty. Ferdinand Topacio sa nominasyon bilang Ombudsman ni atty. Edna Batacan na dati namang abogado ni dating First Gentleman Mike Arroyo.
Sa dalawang pahinang liham ni Topacio sa Judicial and Bar Council, sinabi nito na wala siyang personal na galit o sama ng loob kay Batacan bagkus ang dahilan ng kanyang pagtutol ay usapin ng “integrity” at “probity.”
Nagkaroon anya sila ng magkaparehong kliyente ni Batacan at naikuwento anya ng naturang kliyente na hindi muna nito pinangalanan na hiningan ito ni Batacan ng 8 Million Pesos kapalit umano ng dismissal ng mga kinakaharap na kaso ng kanyang kliyente sa Ombudsman.
Nagreklamo rin anya ang kanyang kliyente nang singilin ito ni Batacan ng 1 Million Pesos para sa photocopying ng mga dokumento sa kaso nito.
Samantala, handang harapin ni Topacio si Batacan sa isang Executive Session ng Judicial and Bar Council para idetalye ang kanyang pagtutol.
Kabilang din sa mga nagnanais na maging tanod bayan sina Supreme Court Associate Justice Samuel Martires, Labor Secretary Silvestre Bello, Sandiganbayan Associate Justice Efren Dela Cruz at special Prosecutor Edilberto Sandoval.